毛孩生日大晒！「無負擔」紫薯生日蛋糕食譜🐶

各位寵物家長係咪成日頭痛，狗狗生日🎂到底可以食咩慶祝？買街外蛋糕又驚太甜、有添加劑？今次就等小編教大家整超簡易「毛孩專屬紫薯蛋糕」！用天然食材，唔落糖、唔落油，健康又放心，仲要顏值爆棚，保證狗狗食到舔舔脷～

✨ 點解揀紫薯？

紫薯唔止顏色靚，仲係超級食材！富含纖維同維他命，對腸道同皮膚都好，而且天然甜味狗狗都鍾意，絕對係慶祝首選！

---

🎂 材料： 雞蛋3隻、麵粉 50g、清水 25g、紫薯蓉適量、 鮮牛肉適量

可製作件數： 大約製作出蛋糕約重1磅

製作程序：

🔪 裝飾材料準備

紫薯蓉：

1. 紫薯去皮切件，蒸到完全熟透（用筷子可以輕易插入）。

2. 用叉或壓蓉器將紫薯壓成幼滑薯蓉，攤凍備用（熱嘅話會整壞其他材料）。
   

鮮牛肉裝飾：

1. 牛肉蒸熟或者用清水烚熟，確保全熟。

2. 放涼後，可以切成細粒或撕成幼絲，備用。

🍳 蛋糕體製作（詳細圖解步驟）

Step 1：分蛋大法 將雞蛋嘅蛋白同蛋黃完全分開，放入兩個乾淨、冇水冇油嘅大碗。蛋黃、蛋白留用。

Step 2：打發蛋白（關鍵步驟！） 用打蛋器將蛋白打發，打到出現堅挺嘅小彎勾（即係反轉個碗都唔會流落嚟嘅狀態）。呢步係蛋糕鬆軟嘅秘密！

Step 3：混合蛋黃糊 將清水加入蛋黃中，輕輕攪勻。然後將蛋黃液同已過篩嘅麵粉，一齊倒入打發好嘅蛋白裡面。

Step 4：溫柔拌勻 用刮刀以「切拌」手法（好似炒菜咁），輕力又快速地將所有材料拌勻，直到冇明顯粉粒。記住唔好大力攪，會消泡！

Step 5：入爐烘烤

• 將麵糊倒入蛋糕模具中，輕輕震幾下去除大氣泡。

• 放入已預熱至 160°C 嘅焗爐下層，焗約 30分鐘。
  

Step 6：測試熟度 用一支牙籤或竹籤插入蛋糕中心，抽出來如果乾爽冇麵粉黏住，即代表熟透！出爐後要立即脫模，放上網架攤凍。

Step 7：修整及組裝

• 將完全放涼嘅蛋糕，用刀切走頂部隆起嘅部分，做出平整表面。

• 將預先準備好嘅紫薯蓉，好似批盪咁平均塗抹在蛋糕表面同側邊。

• 最後，按你同毛孩嘅喜好，用牛肉絲、藍莓等做裝飾，大功告成！🎉

---

💡 零失敗小貼士（必睇！）

1. 模具點揀？ 因為呢個蛋糕冇落油同糖，比較「癡模」。建議直接用矽膠模具，或者用牛油紙墊底，完美脫模冇難度！

2. 「忌廉」代替品：想有擠花效果？可以用無糖希臘乳酪代替忌廉，健康又穩陣！

3. 麵粉點處理？ 香港天氣潮濕，麵粉好易結塊。記得一定要先「過篩」，整出嚟嘅蛋糕質感先會細緻綿密。

4. 食量要控制！ 呢個始終係零食蛋糕，慶祝食一兩件就好，千祈唔好當正餐餵呀！
   

整完記得同壽星仔女影多幾張相呃Like！ 🥳 祝你同毛孩都有個甜蜜難忘嘅生日～